Appostolat tat-Talb

Il-Papa jixtieq li matul ix-xahar ta’ Awwissu nitolbu għal dawk li huma bla xogħol jew bla dar biex isibu min jilqagħhom u jgħinhom fid-diffikultajiet tagħhom
Qari mill-Evangelju ta’ San Mattew  (Matt 8:18-20)
Meta ra ruħu mdawwar b’ħafna nies, Ġesù ordna li jaqsmu għax-xatt l-ieħor. Mbagħad resaq fuqu wieħed mll-kittieba u qallu: "Mgħallem, tmur fejn tmur, jiena niġi warajk". Imma Ġesù  wieġbu: "Il-volpijiet għandhom l-għerien tagħhom, u l-għasafar tas-sema l-bejtiet; iżda Bin il-Bniedem m’għandux fejn imidd rasu."
Mulej, Ġesù meta kont fid-dinja, Inti għażilt li xxandar il-Bxara t-tajba
U din l-għażla kienet tfisser li kien ikollok  tmur minn post għall-ieħor.  U għalhekk, inti kont taf x’jiġifieri li ma jkollokx dar.
Kont taf x’jiġifieri tiddependi minn ħaddieħor biex ikollok saqaf taħt rasek, imqar għal-lejl wieħed biss.

Il-Papa jixtieq li matul ix-xahar ta’ Ġunju nitolbu biex kull ċentru tas-saħħa jassigura r-rispett għall-ħajja umana mill-bidu sat-tmiem naturali tagħha. Il-Papa wera x-xewqa li l-istutuzzjonijiet nazzjonali u internazzjonali jifhmu l-missjoni tagħhom li jippromovu l-ħajja għal benefiċċju tal-popli kollha. Hu jixtieq li l-aġenziji soċjali kollha jingħaqdu flimkien biex jiddefendu l-ħajja u jikkumbattu l-forza ta’ dawk li b’xi mod jew ieħor jiżirgħu t-tbatja u l-mewt fid-dinja fosthom l-abort, il-ġuħ, il-mibgħeda u l-gwerer.

Ġesu’ qalilna: “Jien ġejt biex ikollkom il-ħajja, u ħajja bil-kotra.”(Ġw 10:10)  Alla wera lilu nniffsu lid-dinja permezz ta’ Ġesù u qalilna biċ-ċar li hu ġie biex iwassal lil kull wieħed u waħda minna għall-ħajja, anzi għall-milja tal-ħajja. Il-Knisja, li timxi fuq it-tagħlim ta’ Ġesù minn dejjem iddefendiet il-ħajja tal-persuni umani, sa mill-bidu tagħha, qabel it-twelid u sat-tmiem naturali tagħha. Għalhekk il-Papa qed jitlobna biex nitolbu ħalli l-bnedmin juru r-rispett li jixraq lejn il-ħajja umana.